“Lufta po hyn në fazën tjetër”, Izraeli paralajmëron lëvizje të papritura

Shefi i Forcave të Armatosura të Izraelit, Eyal Zamir ka njoftuar se operacionet ushtarake kundër Iranit po hyjnë në një fazë të re. Ai tha se ushtria izraelite do të ndërmarrë veprime të tjera që nuk janë bërë publike.

Gjatë një konference për shtyp, Zamir deklaroi se Izraeli ka krijuar epërsi pothuajse të plotë në hapësirën ajrore iraniane. Sipas tij, kjo situatë u mundëson forcave izraelite të zgjerojnë operacionet kundër infrastrukturës dhe kapaciteteve ushtarake të regjimit iranian.

Ai tha se faza e ardhshme e luftës do të përfshijë sulme më intensive dhe lëvizje të papritura, për të cilat nuk dha detaje.

Zamir deklaroi se forcat ajrore izraelite kryen rreth 2,500 sulme dhe përdorën më shumë se 6,000 municione gjatë operacioneve. Ai shtoi se ushtria shkatërroi rreth 80 për qind të sistemeve të mbrojtjes ajrore të Iranit.

Sipas tij, sulmet goditën gjithashtu kapacitetet raketore të Iranit. Zamir tha se rreth 60 për qind e lançuesve të raketave janë shkatërruar, por theksoi se kërcënimi nuk është eliminuar plotësisht.

Komanda izraelite paralajmëron se operacionet do të vazhdojnë, ndërsa ushtria synon të reduktojë më tej kapacitetet ushtarake të Iranit.