Parandaluam me sukses grushtin e shtetit, Berisha: Në shkurt do të çlirojmë Shqipërinë nga diktatori

Kreu i Partisë Demokratike, Sali Berisha, ka nisur fjalën e tij para protestuesve në tubimin kombëtar të opozitës, duke e cilësuar situatën aktuale si një nga më alarmantet që ka përjetuar vendi që prej rënies së komunizmit.

Berisha deklaroi se opozita dhe PD-ja kishin parandaluar një grusht shteti me sukses, ndërkohë që shtoi se në shkurt do të rrëzojnë diktatorin Rama ashtu siç rrrëzuan dikur bustin e Enver Hohës.

“Qytetarë dhe qytetare të mbarë Shqipërisë, zhvillimet e ditëve të fundit bëjnë që ne të mblidhemi sot në këtë shesh në kushte ndër më alarmantet. Ndoshta jemi mbledhur në kryengritjen tonë paqësore, në momentin më kritik të Shqipërisë në 35 vitet e fundit. Ndaj dhe më duhet të nis këtë fjalë me një shprehje që sot tingëllon më aktuale, më e rëndësishme se kurrë. Ata që harrojnë të shkuarën janë të dënuar ta përsërisin atë. Miqtë e mi, Shqipëria është një vend i bekuar se kemi njëri-tjetrin, ja ku jemi këtu, një det i madh luftëtarësh, guximtarësh, njerëz të vendosur t’i dalim zot Shqipërisë. Shqipëria është një vend i bekuar prej pasurive përrallore që Zoti i ka dhuruar asaj, jemi të bekuar për traditat tona të mrekullueshme të mbartura gjeneratë pas gjenerate. Mirëpo nëse Shqipëria është e bekuar me popullin e saj e pasuritë e saj, nuk mund të mohohet se ne kemi qenë apo kemi përjetuar mallkime në një farë mënyre ne kemi përjetuar dhe provuar armiq të egër të pamëshirshëm ndaj nesh, që padyshim i kanë sjellë dëmet më serioze kombit tonë. Kurrë nuk duhet të harrojmë shekullin që lamë pas, diktaturën e Enver Hoxhës, krimet që kreu ajo ndaj shqiptarëve. Të gjitha këto i vodhën shqiptarëve 45 vite jetë, gati gjysmën e shekullit të kaluar. Asnjë nuk ka dyshime, ndonëse sot ka përpjekje për rehabilitimn e atij regjimi nga bijtë bastardë të saj. Se Enver Hoxha ka qenë një armik i egër, Hitleri shqiptar i pas luftës së dytë botërore.
Ky armik i egër na qeverisi për 45 vite pavarësisht krimeve të tij. Po sot çfarë po ndodh me Shqipërinë? Nëse shekullin e kaluar u mbajtëm peng 45 vite, në këtë shekull me një shpejtësi krejt tjetër Shqipëria përballet me pasoja akoma më katastrofike”, tha Berisha.