Prapaskena

Aktualitet

Mbushi shtëpinë me euro / E besuara e Tigrit është kunata e Ceno Klosit, lidhja me Belinda Ballukun. Pastruesja hajdute u përgjua. Po florinjtë ku i gjeti?

Publikuar: 09/01/2023

Detaje të reja kanë dalë në dritë nga sekuestrimi i shumës së bujshme prej qindra mijë eurove që iu bë Rozeta Dobit dhe Havier Dobit, të cilët i kishin grabitur paratë në banesën e ish-shefes së kabinetit në Ministrinë e Financave, Alda Klosi.

Prapaskena mëson se e besuara e Arben Ahmetajt, Alda Klosi, që kishte mbushur shtëpinë me para dhe florinj, është kunata e Ceno Klosit, drejtorit të Tatimeve, i cili jep 140 mijë paund me fajde dhe ka një vilë luksoze në Londër.

Ndërsa vetë Ceno Klosi është djali i tezes së ministres Belinda Balluku. Kështu që zgjerohet rrethi i dyshimeve për paratë, të cilat mund të jenë para korrupsioni të vetë Alda Klosit, mund të jenë të Arben Ahmetajt, por mund të jenë edhe të Ceno Klosit, i lakuar për afera korruptive.

Klosit i janë vjedhur nga pastruesja Rozeta Dobi 524.800 euro, 8500 dollarë dhe 368.000 lekë të rinj si dhe aksesorë flori.

Alda Klosi ka thënë se paratë i kishte mbledhur për një fatkeqësi që t’i vinte, ndërsa për florinjtë nuk ka thënë deri tani asnjë alibi.

Shuma e parave është vjedhur së bashku me kasafortën e lëvizshme që zyrtarja e ministrisë Alda Klosi mbante në shtëpinë e saj që ndodhet në rrugën e “Kosovarëve” në Tiranë.

Klosi nuk ndodhej në banesa, pasi ishte në një udhëtim jashtë shtetit. Ndërsa një kopje të çelësit të shtëpisë ja kishte besuar pastrueses së saj personale, Rozeta Rakipllari alias Dobi.

Rozeta Rakipllari, ka pranuar të tregojë se vjedhjen e banesës së Alda Klosit, e ka kryer së bashku me djalin e saj, Havier Dobin, i cili e ka ndihmuar për të lëvizur kasafortën që Klosi mbante në shtëpi.

Rakipllari ka pasur dijeni se brenda në kasafortë kishte një shumë të madhe eurosh, pasi sipas saj, e kishte parë disa herë pronaren e shtëpisë të hapte kasafortën në prezencë të saj.

Në momentin që Klosi e ka njoftuar se do largohej nga banesa për disa ditë dhe i ka lënë një kopje të çelësit të shtëpisë, Rozeta Rakipllari së bashku me djalin e saj Havier Dobi, kanë vënë në zbatim planin për të bërë vjedhjen e kasafortës.

Pastruesja ka hapur derën me çelës dhe së bashku me të birin kanë nxjerr kasafortën. Për ta bërë të besueshme, vjedhjen ata kanë bërë rrëmujë shtëpinë, duke u larguar më pas.

Kasafortën e kanë hapur në shtëpinë e tyre, duke nxjerrw dhe shumën financiare dhe fshehur në ambientet e shtëpisë. Por pas hetimeve të kryera, oficerët e komisariatit nr.2 në Tiranë, zbuluan se autorë të dyshuar të vjedhjes së mbi gjysmë milion eurove, janë Rozeta Rakipllari dhe djali i saj, Havier Dobi.

Policia ushtroi një kontroll në shtëpinë e tyre, ku ditën e parë gjeti shumën prej 120 mijë euro. Kjo shumë financiare është pranuar nga pastruesja se ishte vjedhur në banesën e zyrtares së ministrisë, Alda Klosi.

Rozeta Rakipllari dhe djali i saj Havier Dobi, është përgjuar brenda në dhomat e shoqërimit të komisariatit, ku nënë e bir, flisnin së bashku se policia kishte gjetur vetëm 120 mijë euro, por jo shumën tjetër të fshehur prej tyre në tubin e aspiratorit.

Kjo bisedë ka shërbyer si indicie e fortë për policinë, se brenda në banesë kishte dhe para të tjera të fshehura. Mesditën e sotme, policia shkoi dhe kontrolloi sërish shtëpinë e pastrueses, duke gjetur shumën prej 404.000 dhe vlerave të tjera monetare.



Më të lexuarat