Prokuroria ka rihapur hetimet për 21 janarin, konkretisht për vrasjen e protestuesit Aleks Nika.
Nga hetimet e mëparshme të Prokurorisë, shumë nga të cilat mbetën pezull, ka rezultuar se ish-kreu i Gardës, Ndrea Prendi ka qëlluar 11 fishekë në ditën e demonstratës së 21 janarit.
Ndrea Prendi kishte thënë nĕ deponime se: “nuk kam qëlluar fare me armë zjarri, si dhe nuk u është dhënë urdhër as komandantëve të njësive mbështetëse, apo njësisë speciale për të qëlluar me armë në drejtim të protestuesve”.
Por një raport konfidencial i siguruar nga Hashtag.al, godet alibinë e ish-komandantit të Gardës, Ndrea Prendi, lidhur me ndërrimin e tytës së pistoletës së tij gjatë hetimeve për vrasjen e katër qytetarëve më 21 janar 2011.
Raporti konfidencial i është dërguar ambasadës amerikanë në Tiranë dhe në këtë raport thuhet se ekspertët e laboratorit balisitik kishin frikë të firmosnin dhe certifikonin manipulimin e tytës së pistoletës së shërbimit të Ndrea Prendit. Ata kanë kërkuar që ekspertimi të bëhej nga ekspertë të huaj dhe ambasada amerikane ia ka kaluar FBI-së.
Ish-komandati i Gardës së Republikës, Ndrea Prendi, deklaroi në emisionin Opinion të Blendi Fevziut disa muaj më parë, se tyta e armës së tij ishte ndërruar pas ngjarjes së 21 janarit 2011, ku para kryeministrisë u vranë katër qytetarë.
Ish-zyrtari i lartë pohoi se për këtë gjë ishte akuzuar shoferi i tij, të cilit i ishte bërë presion nga prokuroria asokohe. Po çfarë deklaronte Ndrea Prendi dy ditë më parë i pyetur mbi ndërrimin e tytës së pistoletës së tij të shërbimit pas ngjarjeve të 21 janarit.
“Për këtë është akuzuar shoferi im të cilit i është bërë presion nga Prokuroria që të deklarojë atë që nuk është e vërtetë, teksa ka deklaruar se kishte patur akses të plotë në armatimin e Gjeneralit.
Në momentin që Prokuroria ka marrë armatimin tim, ata e kanë marrë nëpër thasë dhe është mbajt mbi 5 muaj. Nga studimi balistik ka dalë që arma ime është në rregull.
Prokuroria është tërhequr nga kjo akuzë dhe shoferi është i lirë. Në momentin që u mbyll protesta, Prokuroria ka bërë fajtor komandatin e Gardës së Republikës.” – pohoi Prendi.
Hashtag.al ka arritur te sigurojë raportin konfindencial të prokurorisë së rrethit gjyqësor Tiranë, lidhur me hetimet e kryera ndaj armëve në përdorim nga Garda e Republikës që kanë bërë qitje ngjarjen e 21 janarit.
Gjetjet e Prokurorisë
Nga moria e gëzhojave të gjuajtur, thekson raporti, vetëm 11 prej tyre rezulton se janë qitur nga pistoleta ‘Beretta model 92-FS me numer P52796Z’, në përdorim nga Komandandti i Gardës asokohem Ndrea Prendi.
Ndërsa gëzhojate tjera që janë gjetur në vendin e ngjarjes rezulton të jenë qitur nga armët model ‘MP-5’ në përdorim nga efektivët e Gardës. Po kështu, vetëm njëra nga predhat e gjetura rezulton të jetë qitur nga pistoleta ‘Beretta model 92-FS me numer P52796Z’, në përdorim nga shoferi i Prendit.
Në raportin konfidencial të prokurorisë, zbulohet se 11 gëzhojat e qitura nga arma me numër P52796Z e Prendit janë të tipit MKE 9mm MP-5, prodhuar nga kompania turke ‘Makina ve Kimya Endustrisi Kurumu’ dhe janë municion që e ka pasur në disponim vetëm ish-Komandanti i Gardës, Prendi.
Pas ekzaminimit balisitik nga ekspertët, rezulton se predha e vetme qitur nga pistoleta tjetër Beretta, ajo në përdorim të shoferit të Prendit është gjetur e futur në një pemë në krahu e majtë të Kryesisë së Kuvendit. Ekspertët kanë zbuluar se predha e gjetur në trupin e viktimës Faik Myrto, me një probabilitet prej 60% është qitur nga e njëjta armë, ajo e shoferit të Prendit.
Hezitimi në identifikimin e armëve qitëse sipas ekspertëve vjen pasi si krahasim nuk janë përdorur predha jo të njëjta me ato që janë qitur më 21 janar 2021.
Me sy të lirë, thuhet në raportin konfidencial, pistoleta me numër ‘P52778Z’ ka shenja më të lehta përdorimi se ajo e Prendit me numër ‘P52796Z’. Por eksperti vijon duke thënë se tyta e pistoletës së shoferit të Prendit, mbart më shumë gjurmë që tregojnë se është pëdorur më shumë sesa tyta e pistoletës së Prendit me numër ‘P52796Z’, së cilës i përkasin 11 nga gëzhojat e gjetura në vendin e ngjarjes.
Në fund të raportit, prokurori thotë se bazuar në faktet e lartpërmendura, lind dyshimi i natyrshëm dhe i arsyehëm se tytat e dy pistoletave janë ndërruar me njëra-tjetrën.
Ekspertët teknikobalistikë, thuhet në raportin e prokurorisë, kanë pohuar në mënyrë konfidenciale se gjilpëra e pistoletës me numër ‘P52796Z’të Ndrea Prendit, në momentin kur është bërë ekzaminimi balistik ka qenë e përpunuar mekanikisht (goditur).
Një fakt i tillë nuk është përmendur në aktin e ekspertimit përkatës pasi ekspertët kanë pohuar në mënyrë konfidencale se i druheshin një ‘hakmarrjeje’ eventuale. Ata kanë kërkuar që ekspertimi të bëhej nga FBI-ja amerikane pikërisht për të shmangur ‘hakmarrjen’ që dyshonin se mund të vinte pas ekspertizës së tyre.
*Raportin konfidencial të prokurorisë në PDF e lexoni këtu: Raporti Konfidencial
