Një ngjarje e rëndë raportohet të ketë ndodhur mesditën e sotme në ambientet e xhamisë “Dine Hoxha” te “Rruga e Kavajës.

Një person i identifikuar nga policia si Rudolf Nikolli është futur në ambientet e këtij kulti fetar dhe me një thikë buke ka plagosur 5 persona.

Fatmirësisht nuk ka viktima falë ndërhyrjes së shpejtë të policisë. Ende nuk dihet se pse ka ndodhur kjo ngjarje në këtë muaj të shenjtë të Ramazanit.

Tiranë/Informacion paraprak

Rreth orës 14:30, në Rrugën e Kavajës, një shtetas është futur në ambientet e një kulti fetar (xhami) dhe në rrethana ende të paqarta ka plagosur me mjet prerës 5 shtetas. Falë reagimit profesional dhe të menjëhershëm të shërbimeve të Policisë është bërë i mundur neutralizimi dhe prangosja e autorit të dyshuar, shtetasi Rudolf Nikolli 34 vjeç, nga Burreli, i cili po shoqërohet në ambientet e Drejtorisë Vendore të Policisë Tiranë, për veprime të mëtejshme.

Ndërkohë, shërbimet e Policisë iu kanë dhënë ndihmën e parë shtetasve të lënduar, të cilët janë transportuar në spital, për ndihmë mjekësore dhe ndodhen jashtë rrezikut për jetën. Në vendngjarje ka mbërritur grupi hetimor dhe nën drejtimin e Prokurorisë vijon puna për sqarimin e rrethanave dhe dokumentimin e plotë ligjor të ngjarjes.