Violeta Staka është gruaja që ka zëvendësuar zyrtarisht Arben Malajn në pozicionin e anëtarit të Këshillit Mbikëqyrës të Bankës së Shqipërisë.
Kandidatura e zonjës Staka u miratua nga Kuvendi në 3 dhjetor 2020, ndërsa vendimi u botua në Fletoren Zyrtare në 29 dhjetor 2020, duke i hapur rrugë kandidates që të nisë detyrën në fillim të vitit 2021.
Violeta Staka është bashkëshortja e anëtarit të Këshillit të Lartë të Prokurorisë, Vatë Staka, i cili ka kaluar me sukses procesin e Vetingut. Vatë Staka ka ushtruar funksionin e prokurorit në Shkodër.
Violeta Staka ka lindur në Tropojë në Tropojë në vitin 1969. Ajo ka mbaruar shkollën fillore dhe shkollën 8-vjeçare në këtë qytet dhe më pas ka filluar shkollën e mesme tregtare Vlorë, dega ekonomi. Fakultetin e Ekonomisë përfunduar në vitin 1991.
Po këtë vit ka filluar punë si administratore në Kryqin e Kuq në Tropojë. Nga viti 1992 deri në vitet 2000 ka punuar në fushën e sigurimeve shoqërore në zonat e Shkodrës.
Më pas ka punuar në Shërbimin Social Shtetëror për një periudhë të shkurtër disamujore dhe në tetor të vitit 2000 dhe deri më pas ka punuar në Drejtorinë Rajonale të Sigurimeve Shoqërore.
Ndërkaq, ish-ministri dhe ish-deputeti socialist Arben Malaj u shkarkua me propozim të grupit parlamentar të Partisë Socialiste në 18 dhjetor të 2019, me argumentin se ka mbajtur qëndrime personale politike, të cilat nuk lidhen me politika mbikëqyrje të Bankës së Shqipërisë.
Më parë, në 12 mars 2019, qeveria, me propozim të kryeministrit Edi Rama vendosi pezullimin e Malajt nga detyra si dhe i propozoi Kuvendit shkarkimin e tij.
Në 15 korrik 2019, edhe grupi parlamentar i PS i propozoi Kuvendit shkarkimin e Malajt. Këtë vendim Malaj e ka ankimuar deri në Gjykatën Kushtetuese. Kjo e fundit e ka rrëzuar kërkesën e Malaj për shqyrtim që në dhomë këshillimi. (Shqiptarja.com)
